試衫0既時候小雲同我講無肩帶Bra唔係好work，因為D 衫好多都露背，最好都係用Nu Bra。結果响逢甲夜市D 內衣店買左一生人裡面第一個Nu Bra，仲要個姐姐教我戴...
另外天氣都有D 冷，去屈人寺買定暖包傍身~
原本好早就跳上床訓，希望精力好D，點知成晚係咁醒， 最後起身開埋電視!
好彩Sam爸可以訓到，唔係仲麻煩...
8點幾起身，個人唔夠訓好唔精神，拿拿臨去沖個涼洗個頭醒一醒。
跟住去樓下食個免費早餐，ok 啦，早上附近都無咩野食，因為夜市開到成12點，所以D 鋪都好少開早。
食飽返上樓check多次要帶0既野:
- Order form
- 女裝鞋黑白各一對
- 黑色男裝鞋
- Nu Bra
- 結婚戒指
- 帽
- 打底褲
- 暖包
- Sam爸0既襯衫2件 + Polo shirt 2件
齊，出發!!
Masalili 個appointment time 係10點，我地大概9:45左右就到。
有個女仔幫我拎返晒改好0既衫，再試多次，唔記得問佢叫咩名!
有兩件要再稍微改改，一件太鬆，一件太緊~
佢地改得好快，轉頭就搞掂!
跟住佢地帶我地去巷對面另一棟樓，一路行就已經見到有人著到好型咁!
入到去已經有人化緊妝啦，包括0個對港人。
我遲左，所以要等人地搞掂先到我。Sam爸同我就一人一部機打發時間。
10:15左右，有個肥肥地0既男仔叫Ivan，叫左我入房上捲筒同搽指甲油。
10:30，到我化妝啦! 我個造型師係Mandy~ 俾左D 功課(人地D 造型)佢睇... 佢問我有D 咩接受唔到，我話俾佢渣主意。
佢隻手好凍.... 仲好大陣煙味... 未必係佢之前食煙，可能係長期吸煙者0既味道，Sam公公係煙民，我從細就聞慣呢種味道。
佢好熟手，好快就化好底妝。Sam爸就入黎同我講佢都去裝身，放低手袋响我度。
Mandy都幾好傾，一路化一路傾，時間過得好快，第一個造型因為係出外景，造型師唔會跟車，所以佢要整一個可以好容易變0既髮型。我頭髮少，難定型搞左佢好耐~
人生第一次又出現啦:
- 黏假眼摺毛
- 剃眼尾毛
- 黏雙眼皮貼
黏住雙眼皮貼+假眼摺毛，隻眼係好痛架，好佩服0個D 成日要扮大眼0既人!
第一套係魚尾白紗，第二套係紫白色蓬裙中間透視，第三套係藍綠色短紗裙~
望下個鐘，嘩，成12點幾啦!!
Sam爸行入黎，白色西裝，唔肥wor，仲幾靚仔添!!
搞掂晒，可以上車啦。Tommy就同我地講個壞消息，無得影水。
我個心情即刻變差... 咁山長水遠走黎影相，你話唔得???
Tommy 勁話唔好意思呀，經理話如果幫我影，對其他香港客人會唔公平。
我再重新一次，我唔係香港客人，我係美國客人!!
0個刻，其實都幾想喊架~
不過無計架，人地唔肯就係唔肯架啦，唔影咩...
出車去買花做道具，佢地停左响個路邊花鋪，燈光兼助手小毛同Sam爸落車買。佢地問我買咩，我話事但啦，講真，0個刻都仲唔開心緊，邊有心情睇花呀~
Tommy 渣主意，買左紮香檳色玫瑰，然後出發去第一個景點係教堂。
到達後，Tommy 落車睇環境，小毛就教我地D 動作，例如當Tommy話下巴推即係頭同頸都不動，下巴向外推出去(之後知道咁樣可以影唔到雙下巴!)。
Tommy好開心咁返過黎話，無人呀，正，快D 出來影相!
小毛擒高擒低幫手打燈，睇見到登佢危險。
之後就响呢度影左半個鐘到45分鐘左右，我地再上車出發去花田。
上車後，小毛俾左兩個三文治我地左午餐，好好味架，我估係因為有mayo醬0既關係啦~
去到花田，其實係一個花園0既地方，有人响門口BBQ! 除左我地之外，仲有3 對都係响度影相，所以都要大家就下，你影呢種花，佢就影另一種。
Tommy真係好pro，影到趴响地不單只，仲要逗Sam爸笑，因為Sam爸影相係唔識笑0既................
原來擺pose係好辛苦架，成日都要'ou'腰，收腹，推下巴... 好彩又唔係太大風，暖包用唔著，不過等影都有D 寒.... 又留左件衫晌車，都幾惡頂
不過呢，好多時我係咁意坐，Tommy都會叫我hold住再執一執就影。Sam媽果然係無敵pose王!!!
換衫時間，花園pro到有更衣室。Sam爸幫我換完，佢自己都換。Tommy就幫我換髮型同髮飾，小毛就幫我補妝。
影影影影影...
搞掂，行得，但係Sam媽內急左好耐啦，著住條蓬裙，點去呢?
真係忍唔到啦，照去啦，又OK wor，唔係想像中咁難~
上返車，小毛叫我換最後一套衫，亦係唯一一套短裝，但係我唔記得著打底褲!!
佢地搵野block 住架車頭，Sam爸就幫我換。之後佢地又幫我換髮型同補妝就去最後一個外景，鐵道~
鐵道個景係個荒廢0既舊車站，好多蚊，帶左蚊怕水但係唔拎埋去影相，唔知搞乜!
Tommy叫我地跟住佢，而佢就轉身跳左落路軌。我望下自己，3寸高争鞋wor，點跳呀，你玩我呀?!
我地兩個於是震騰騰咁，扶住D 邊邊落去，落到去，對鞋係咁俾D 石仔攝住，興興地，我連鞋都除左黎行!
我要坐低响路軌度影相0既時候先記得，死啦，唔著打地褲，條裙又超短，仲要只係著住茶包!!
可以點呀? 頂硬上囉，冒住走光0既危險，坐地，比Sam爸抱起......
Tommy勁呀，訓路軌，跪石仔咁影!
完成外景，仲有內景，拿拿臨上車返Masalili，上車前Tommy左幾個人型燒請我地食，不過我依然無胃口，仍然對影唔到水耿耿於懷。
40分鐘左右就返到Masalili，大概6點幾，Mandy已經等緊我，但係原來我地算早。
(唔俾影相架, 去廁所0個陣偷影.... 其中一個造型)
Mandy 問我食唔食左飯先，我話唔好啦，快D 影完好過。砰砰聲換造型，著埋最後一套白紗，影影影。
再換多一套，係5套裡面我最鐘意0既黑色! 個造型我都好鐘意架，係我呢世女都唔可能有0既爆炸頭(我好少頭髮...)!
8:15，終於影完啦!!!!!!
Mandy 幫我叫左飯，我叫佢幫我拆左個頭先，等我食完飯先落妝。
個飯係Masalili包架，味道都OK。
小毛帶我地去個空房食飯，20 分鐘之後接返我地。返去化妝間Mandy 幫我係咁意落左D 誇張0既makeup。
再過去營業門市，葉葉同佢D assistant係咁話辛苦啦~ Tommy先辛苦啦...
葉葉問我地拎$，我望住佢，你尋日無同我講wor，無帶錢呀。同埋，影相去咁多地方，好唔安全0者!
最後同Tommy，Mandy，小毛同葉葉影左相。
辛苦做一日，返酒店洗白白，再度出征逢甲夜市!
影完相，唔使再就住就住，放肆地食呀!!!!!!!!!!!!!
傳聞中好味胡椒餅, 味道真係頂呱呱!!
************************
題外話:
你地唔好咁心急啦，我打字慢，已經好努力出post 架啦!!!
發表文章
F
回覆刪除