養大狗不是罪

睇左一篇訪問，我睇到把幾火!!

被訪人一個人响唐樓養9隻大狗，本來我很佩服佢，加埋佢話大部分都係收養番0黎，原是一件好事。

但Sam媽真係一路睇一路鬧...

大家先睇一睇個訪問先:

---------------------------------------
交易通  - 982期

Pet Book
我愛大狗狗
2010年11月17日

你有冇想像過同一班大狗共處一室會係點？如果唔係主人 Kaby事先聲明，話啲狗狗好熱情冇惡意，否則記者見到有大白熊、聖班納、都柏文等大狗列隊歡迎自己，一定嚇到腳仔軟！

別人收養狗狗，多數以細狗居多，但 Kaby自細鍾情大狗，貪佢哋夠忠心個樣又夠傻。除咗第一隻收養嘅三腳曲架 BB外，其餘唔大唔養，所以家住喺 600呎嘅唐樓單位，成個廳只得一個電視櫃同雪櫃，其餘空間　晒 9隻狗狗住，記者只可以用偉大嚟形容 Kaby，照顧隻隻過百磅嘅狗，少啲體力都唔掂！

要入去 Kaby屋企，只可以開少少門罅，否則所有狗會衝晒出去。記者同攝影師好唔容易入到去，面對嘅場面何其壯觀，記者與攝影師被眾龐然巨物圍攻，有兩隻即刻搜略記者嘅包包，另外又有幾隻向我哋前撲後撞，突然間有雙狗拳向記者個肚腩打過嚟，快到連記者都唔知俾邊隻突襲，全程記者同攝影師惟有舉起雙手，企定定任佢哋推撞，等佢哋熟習有外人喺度，最後經過 15分鐘，記者頂唔順，拉咗 Kaby喺閘外露台做訪問。

Kaby笑笑口話：「我啲朋友嚟到，必定經歷呢個情況，但佢哋冇惡意，只係對你好奇，好似伯恩山混金毛嘅 Taiya突襲你個肚腩，只係想同你抱抱。」家中所有狗狗，全部都係 Kaby領養返嚟，佢話每隻狗背後都有一個悲慘故事，好似令記者留下深刻印象嘅大白熊 Ginny，當其他狗發晒癲跳嚟跳去，佢就好冷靜靜咁伏喺地上，佢嘅身世都好可憐。

「兩年前有狗義工見到，有 2隻大白熊喺青山道快線近洪水橋附近遊蕩，全身好污糟，跟住接佢哋返去，發現佢哋嘅乳頭組織壞死，相信係因為過度繁殖，再生唔到 BB，被繁殖者放逐，義工知我鍾意大狗，急 call我幫手，帶佢哋去睇獸醫，發現佢哋有皮膚病、牛蜱熱，需要切除壞死組織保命，否則細菌感染手尾好長，最後義工同我分別收養一隻。」

帶狗散步俾人鬧

好多人唔養大狗一來冇地方，二來怕佢哋惡，但 Kaby不單放棄個廳唔放傢俬，畀狗狗多啲活動空間， Kaby開寵物店，喺每日放工後十點幾返到屋企，仲會陪佢哋玩到半夜 3點先瞓，好似趁夜晚冇人，佢會同男朋友用狗帶牽住狗狗落公園散步，分 2次帶， 1次 4隻， 1次 5隻，如果有朋友到訪就一次過帶晒 9隻。

「有試過俾途人鬧，話：『有冇搞錯，養咁多隻大狗！唔好俾佢哋周圍走咬人！』我覺得呢啲人好偏激，大狗一啲都唔惡，佢哋唔會亂去咬人，唔好畀佢哋身形嚇親。」記者好有同感，好多時係細狗惡過大狗，呢班大狗平時好乖唔會嘈，只係偶爾吠兩聲，所以 Kaby住喺呢度 3年幾，都冇俾鄰居投訴，甚至有啲都唔知佢養咗咁多隻狗！

問 Kaby用咗幾多錢係呢班狗狗身上，佢話都係有限錢，反而救其他狗仲用得多錢。「好似之前喺街度執到隻發狗瘟嘅狗，我用咗成 2萬蚊去醫佢，可惜最後都醫唔番。我覺得只要佢哋健康，我負擔大啲都值得。」最難得係得到男朋友支持，同佢一齊照顧班狗狗，放假一有時間就同男朋友逐隻狗狗帶去行山、游水等。問 Kaby仲會唔會收養，佢話體力再負荷唔到咁多，暫時都唔會啦！

---------------------------------------

大家有無留意highlight 0左個段?

Sam媽明白狗狗係好容易興奮，自己隻狗亦係表表者，但係唔代表無問題。

咩叫無惡意，只係想抱抱?!

呢個係人0既想法，自己一廂情願0既想法!!!

同埋一早知道狗狗會撲人，有人到訪0既時候，點解唔一早做好準備，防止佢地撲呀?

隻隻都係大狗，咁撲人法，真係好唔得。收養得番0黎，點解唔好好教？

仲有Door dasher呢個問題，點解唔教狗狗，開門唔代表可以衝出去??

咁當然，佢番工咁忙都肯同狗狗玩，去街街，行山同游水係值得一讚!

大家，養狗同準備養狗0既，請想清楚你究竟有無咁0既時間，耐性同體力先決定係咪要養狗!!

狗狗們無得揀主人，你0既決定係影響佢0地0既一生!

請三思~