[轉載] 狗狗急救大法

見到呢篇野，我覺得大家都應該要知道一D 急救0既方法，如果咁唔好彩，家中狗狗有D 咩事都唔會“拿手唔成世”!


Pet Book
教你狗狗急救大法
2010年04月21日
(轉載自"交易通" 952期)

意外唔止發生喺我哋身上，如果發生喺自己愛犬身上，你會點做？現實中陷阱處處，好似狗狗誤吞玩具、出街擦傷撞損、天氣熱中暑等，狗主幾咁愛錫自己嘅狗狗都好，意外嚟到，最緊要識點做最佳嘅急救方法。

想學番幾招狗狗急救傍身，可以請教獸醫葉枝坤，葉醫生會針對狗狗常見嘅意外，好似中毒、皮外傷同中暑，教我哋點樣即時進行急救！

救命 3寶 
下列嘅急救物品，人狗都用得，唔驚狗主心急救狗嗰時拎錯嘢，勁方便，係愛心狗主必備物件。

紗布 , 繃帶, 鹽水
(所有物品可以响Watsons & Mannings搵到)

中毒要點做？

 1 Check眼底
毒狗事件不時發生，狗主實在防不勝防。獸醫葉枝坤話：「當懷疑狗狗中毒時，可以同狗狗檢查眼底、牙肉，同埋量度心跳，眼底同牙肉位置原本係粉紅色，變成紫黑色就好大機會中咗毒，中毒一定要搵獸醫診治。」

2人工呼吸
狗狗中毒後可能會休克，會冇呼吸或冇心跳，去搵獸醫前可做急救，「狗狗冇呼吸，要向外拉佢條脷，等佢可以唞番氣；亦可以同佢做人工呼吸，狗主要合上狗狗口部，用口覆蓋狗狗全個鼻，再吹氣；狗狗冇心跳，可以用力按佢心臟位置，最好 1分鐘按 80至 120下。」

3扣喉
狗狗好多時為食，唔小心食咗 panadol、細件嘅玩具、朱古力（愈深色愈毒）、天拿水等，「如即時發現，狗主可以伸手指入狗狗口內嘅吊鐘位置，等佢嘔番啲物件出嚟，幫狗狗扣喉時，要注意狗狗多會掙扎反抗，小心咬到手指；狗狗吞咗雞骨等尖銳嘅物件，則唔好刺激佢，因為嘔嘅過程好易割傷狗狗喉嚨，最好咩都唔好做，即刻帶佢睇醫生。至於天拿水等嘅腐蝕性液體，必要時可以畀狗狗飲牛奶，中和毒性。」


皮外傷要點做？
1按傷口止血
帶狗狗出外時，狗狗好易被沙石割傷、甚至同其他狗狗打架受傷等。狗狗出現皮外傷時，主人唔好見外表傷口細就忽略佢，「首先要幫狗狗止血，當然最好用紗布，冇嘅話用手都 ok，邊度流血就按邊度；按極都止唔到血，可以使用繃帶包緊受傷地方，幫助止血，但要留意每 10分鐘鬆一鬆，以免阻礙血液循環。即場可以用水清潔傷口，返屋企之後，最好剷走嗰部分嘅毛，再用鹽水清洗傷口。」

2唔好掂縮腳
狗狗不幸俾車撞倒，最常見嘅情況係斷骨，「見到狗狗一隻腳縮起，只用 3隻腳去行，千祈唔好多手幫佢拉直佢，唔好掂佢縮起嗰隻腳，要即刻帶佢去睇醫生。」


中暑要點做？
淋水急救
夏天就快嚟，帶狗狗外出好易中暑，又肥又多毛同平時歎慣冷氣嘅狗狗係高危一族。「中暑時，狗狗會虛脫，摸落佢身體會發滾，有時仲會抽筋、眼睛翻白。狗主要即刻不斷同佢淋水，直至狗狗身體降溫為止，唔夠水則可以用濕毛巾包住狗狗。」  平時同狗狗出街，狗主記住帶番支水，有備無患。