09墨西哥Cancun之旅 - Day 2

繼續第二日行程之前，補返D 第一日0既野先~

响墨西哥機場0既時候，其實我地都有輕微阻礙。

由於我地準備左OOT bag (out of town bag)俾D guest，其中有D 摺扇仲有個盒包住，過X-ray 0個陣，我地被要求(禮貌地)開箱睇下究竟係咩黎。但係埋到去開左0個陣，佢地又唔係睇D 扇，反而係睇D 水底相機(一次性)。咁都係佢地職責，又唔係難為我地，只係拖左少少時間0者。

上網睇左好多人D 留言，叫出左海關之後，唔好理D time share 0既人。我地好聽話無理0個D 著住老西0既人。而事實上，我地又都無俾人拉住。跟住就直接行左出機場，去搵自己個transfer。

之後响個tour office 姐姐口中聽到，0個D time share 0既人會扮好人話幫你搵D good deal，但如果你之後又唔幫襯，就會好麻煩。最常聽到0既係，佢地會問你拎左credit card 先，你幫襯就無事發生，無幫襯，佢會話好啦，你簽張野就走得，但係0個張野係西班牙文，你唔會睇得明之餘，就算睇得懂，之後會發覺俾人過幾千蚊數無得追~

同埋呢，第一晚酒店有個tribute to Michael Jackson show，我地有去睇架，差D 唔記得左! 0個個扮MJ 0既人呢，真係幾似架，係矮D 咁囉。連唱歌把聲到好似，似到我同Sam爸講，佢可能係咪嘴的!!!

好啦，講第二日~

7/30，星期四，晨咁早就起左身，應該係習慣左要起身返工同帶SamSam出去。

食左早餐，响酒店行下~

因為早，沙灘都未有太多人，水清沙幼，靚!

約左wedding coordinator 11點傾wedding detail，行去meet 0既時候，已經有海豚接觸班~

一路都好擔心會同個wedding coordinator 溝通唔到，但係見到佢0個刻就知道，今次無死啦!

Cecilia 好young，好好笑容，又好耐性，成個過程都好愉快，仲好快就搞掂。

本來個cocktail hour 跟package淨係俾我地揀2 款野，但係見我地心大心細揀唔掂，Cecilia 就俾夠3 款我地!

另外，兩個亞媽都麻麻好牛扒(我地0既main course)，所以我地問可唔可以俾其他野0既時候，佢又俾我地揀要三文魚定seabass，我地要左seabass。

最後，Sam爸同Cecilia講，我地間房離行禮0個邊好遠，結婚0個日如果我著得咁行，又要行咁遠，我會好甘，問佢有無可能幫我地換房。

Cecilia 以前做front desk，帶住我地直闖front desk，幫我地轉左去新building!

因為我地book 左tour，所以拿拿臨返房收拾好D 野，等bell boy 推D 野過新房，自己就出左去~

我地book 0既tour 叫BOB，要响Captain  Hook 度上船。0個度離酒店大概15 分鐘車程，坐的士就$10美金。

到左之後，我地俾左extra $30 買相同DVD。個tour 就$75 美金一位加$5 port tax。

除左我地，仲有一對父子一齊出海。

個tour 其實係machine diving，即係我地會坐住部machine 樣0既物體潛入水底!

D 相影出黎好似我地key 個樣落去咁...

都幾多魚睇架，不過最多係相裡面0既0個種... 早幾年响Nassau 浮潛0既時候，已經見過好多呢種魚~ 所以無預期中興奮...

不過都見到好多其他野0既，只係因為氣壓問題，我隻耳仔一直唔係太舒服，所以我係第一個舉手投降要返上水面的...

跟住，Sam爸都俾D 氣壓搞到唔係咁舒服，跟手上埋水，之後兩父子又上埋。

成個tour 响水裡面大概30分鐘左右啦~

我地俾左$5 小費，但係人地兩父子就俾成$20，搞到我地覺得自己好cheap

返到上岸，Sam爸好唔舒服，攤左响度好耐先走~

之後返到酒店，我地D 野已經送晒去新房。新房响新building 4樓，裡面D 野同之前0個間一樣，不過個露台就望住個wedding gazebo!

Sam爸休息左個幾鐘，終於好返，換衫出去食飯。呢晚去左食壽司~

墨式壽司味道真係麻麻，D飯好明顯係墨西哥米，超大舊!

三文魚好煙三文0既感覺，新鮮，但係唔肥美...

但係飲返碗熱辣辣miso soup，個胃好舒服~

不過佢個泰式salad 唔錯!

呢晚酒店無咩特別節目，我地走去租DVD返房睇。D 戲好舊... 結果租左Xmen3!

行返房0個陣見到有人响gazebo 食romatic dinner，呢晚應該係唯一我地住咁多日無婚禮0既一日。

最後要講下酒店0既internet 問題...

收費貴到喊，$15美金先得24小時，我地問過係咪log off 就可以再用，個staff 話係。咁我地以為24 小時 = 有24 個小時用，點知唔係囉! 係真係一日時間咁大把!!! 呃錢~~~~~~~~~~

酒店有個business center，裡面有3 部機可以上網，每房每日login 有15 分鐘free。好過無，都叫check 得下email，上一上facebook咁囉。但係輪機好麻煩~ 有D 人無聊到死，一大班人等緊都係度四圍睇埋D 無聊新聞都唔讓開囉! 無D 公德心